Altleiteralass

Grüschtet fer de Chrieg, so het der Altleitertag im August agfange, z Schiesse isch de aber ohni Zwischufäll güet uber d'Bühna gange. D meischte Schiss hent ihra Ziil gitroffu, einzelni verfählt, aber nur ganz knapp, üsser mit der gross Magnum mit ZF isch sume im wahrschte Sinn fam Wort der Schuss ab.

Nam Schiesse siwer gmietli ufe Bahnhof Brig wiitergezoge da sind eu d letschte Wandervegel derzüe gfloge. Zäme is de z'Tälli emab bis uf Gampel gange und de het der Chrampf ersch richtig agfange!

Na der monschtrös Wandrig zum Spitzestei-Kapälli sii wer alli kaputt gsi, erholt hei wer nisch aber durch d'Üssicht und eme riichhaltige Aperölii.

Der Wasserleita na siiwer Schritt fer Schritt iischem Ziel, dem Tschingelchäller, necher cho und weme scho durch d Räbbärga geit, de gits eu no z'eint oder anner Ballo!

Z Niedergampel iner Chälleri acho, hent d'erschte scho en Abchielig im Pool gignosse, und süsch müess me säge, äs isch eu güet gsi, hei wer am Morge scho fescht gschosse, da hei wer sicherheitstechnisch scho vill Erfahrige gmacht und mitgibrunge, und es het mit de Fleischspiessa kei Unfäll gigä mit Schnitta oder Wunde.

Fa Poulet uber Späck bis zu Lamm, äs het en feini Üswahl khä, jede het schini Spiessa chänne lade, wiener will und alles chänne nä. Da jede schine eigent Griller isch gsi, het niemer uber de Griller gliiret, und schnäll hei wer na der Prisverteilig di Gwinner fam Tag gfiiret.

Der Abe isch mit Kaffee und Chüeche friedlich üsgiklunge, der Wäg iner Dunkelheit dur z'Tälli emüecha hei wer eu nu gfunne!

Fam offizielle Altleitertag hent aber no nit alli gnüäg khä, so sind es paar Nachtschwärmer z Brig no eine zwei ga nä!

Alles in allem en getapferet und getreute Tag gsi.